Ang National Grid Corporation of the Philippines (NGCP) padayon nga naga balhag sang RED ALERT ukon YELLOW ALERT sa estado sang suplay sang kuryente sa Pilipinas. Ang RED Alert nagakalugan nga kulang ang suplay sang kuryente kag kinahanglan na nga magpatigayon sang Manual Load Drop (MLD) kag Rotational Brownout. Sa pihak nga bahin, ang YELLOW ALERT nagakahulugan nga may nagakaigo nga suplay kag may manipis nga reserve.
Ang isa nga ginapangatubang naton nga problema amo ang kalidad sang suplay sang kuryente nga nagasulod sa Capiz bangud bisan ang nagalatay nga boltahe sa 69kV sub transmission line sang NGCP manubo kaysa sa standard nga boltahe. Suno sa monitoring nga ginapatigayon sang Supervisory Control and Data Acquisition (SCADA), may panahon nga nagalab-ot lamang sa 64 kV tubtob 66 kV ang boltahe nga mas manubo sa standard ng 69kV. Ini nga boltahe nabalhag sa SCADA kag dako sini ang impact sa kalidad sang kuryente nga aton man ginadistribute sa mga konsumidor sa Capiz.
Ang pagnubo sang boltahe nagaresulta sa pagtaas sang CURRENT nga possible nga magresulta sa pag overload sang linya kag power transformer sa sub-station kag may posibilidad nga masamad ang ini ng mga kagamitan. Ginadala na ini sang CAPELCO sa igtalupangod sang NGCP pati ang reklamo sang mga kabanwahanan kag kabarangayan nga sila naga eksperiensya man sang low voltage sa ila nga mga lugar
Isa sang gin follow-up CAPELCO sa NGCP amo ang pag-implementar sang ila plano nga magpatindog sang capacitor bank nga ang tinutuyo amo nga nga i regulate ang boltahe para indi maapektuhan ang bilog nga sistema. Ginatanyag sang CAPELCO ang ginbakal sini nga lote sa likod sang sub-station sa Barangay Lawaan bilang lugar kun sa diin ining capacitor bank ipahamtang.
