Ang pagtaas sang aton konsumo kag ang pagmahal sang presyo sang kuryente sa mekado indi maayo kumbinasyon. Ang resulta sini amo ang mataas nga balayaran sa kuryente nga masami sentro sang reklamo sang mga konsumidor.
Sa pagtuon nga ginhiwat sang mga engineers sang CAPELCO, makita nga dako ang pagsaka sang konsumo sa bulan sang Abril kumpara sa bulan sang Marso. Ang average nga konsumo sa isa ka adlaw sa bulan sang Marso nagalab-ot lamang sa 78,511.67 kilowatt hours kumpara sa konsumo sa Abril nga nagalab-ot gid sa 91,026.42 kilowatt hours ukon may diperensya nga 12,514.75 kilowatt hours. Sa sulod sang 24 oras, mas mataas ang konsumo sa mga inoras halin ala 5:00 sang hapon tubtob alas 10:00 sang gab-i nga ginakabig nga PEAK HOURS. Sa sini nga mga inoras, kun ikumpara ang average nga kunsumo sa bulan sang Marso kag Abril, makita nga ang konsumo sa Abril nga nagsaka sang 12,514.75 kilowatt hours.
Sa pihak nga bahin, gintun-an man ang presyo sang kuryente sa merkado paagi sa gina monitor nga real-time-display (RTD) sa kada minuto kag naga gwa nga may yara man nga pagtaas sang presyo. Sa sulod sang 24 oras, ang mga inoras halin alas 11:00 sang gab-i tubtob ala 5:00 sang hapon (OFF PEAK) ang presyo nagalab-ot lamang sa P7.05 kag kilowatt hour sa bulan sang Marso apang sa PEAK HOURS nagalab-ot gid sa P32.08 kada kilowatt hours. Mas nagtaas pa gid ang presyo sa bulan sang Abril bangud sa tion sang OFF PEAK, ang kada kilowatt hour nagabalor sang P11.30 kag sa PEAK HOURS nagabalor gid sang P33.42 nga mas mataas sa presyo kumpara sa bulan sang Marso sa pareho nga mga inoras.
Ang pagtaas sang presyo sa merkado wala sa kontrol sang mga distribution utility pareho ni CAPELCO pero ang pagkontrol sang konsumo sarang mahimo sang tagsa ka konsumidor. Padayon ang kampanya sang CAPELCO nga pakamaayuhon sang mga konsumidor nga gamiton ang ila mga kagamitan nga naga konsumo sang daku nga kuryente sa OFF PEAK nga mga inoras paagi sa ginatawag nga Demand Side Load Management.
Masami nga ang gina reklamo natuon sa kun pila ang aton balayaran pero mas maayo nga aton man tan-awon kun pila ang aton kunsumo nga nabalhag sa aton nga power bill. Sa sina, mas objective naton nga mahibaloan kun ang pagtaas bala sang aton balayaran bangud sang pagtaas sang rate ukon taripa ukon pagtaas sang aton nga konsumo.
